გერმანიის საგარეო საქმეთა სამინისტრომ გადაწყვიტა, 2025 წლის 1 ივლისიდან მთელ მსოფლიოში გააუქმოს ვიზაზე უარის გასაჩივრების პროცედურა. ამით ვიზების გაცემის პროცედურაში უქმდება სამართლებრივი დაცვის საშუალება, რომელიც აქამდე კანონით არ იყო გათვალისწინებული და იყო ნებაყოფლობითი. 

ეს გადაწყვეტილება ეფუძნება გერმანიის მრავალ სავიზო განყოფილებაში ჩატარებულ საპილოტე პროცედურას, რომლის ფარგლებშიც შენგენის და ეროვნული ვიზების შემთხვევაში უარის მიღების გასაჩივრების პროცედურის შეჩერება 2023 წლის 1 ივნისიდან იტესტებოდა. 

საპილოტე პროცედურის შეფასებამ აჩვენა, რომ გასაჩივრების პროცედურის გაუქმებამ სავიზო განყოფილებებში გაათავისუფლა პერსონალის მნიშვნელოვანი რესურსები, რომელთა გამოყენებამაც შესაძლებელი გახადა მეტი სავიზო განაცხადების დამუშავება. გასული წლის ანალოგიურ პერიოდთან შედარებით მოხერხდა მეტი ეროვნული და შენგენის ვიზების განაცხადების დამუშავება და მოლოდინის დროის შემცირება. 

ვიზების დამუშავებული განაცხადების რაოდენობის გაზრდა და მოლოდინის დროის შემცირება ხელსაყრელი აღმოჩნდა ყველა განმცხადებლისთვის. შესაბამისი სამართლებრივი დაცვა მომავალშიც გარანტირებული იქნება, რადგან კანონით გათვალისწინებული სამართლებრივი პროცესი არ შემოკლდება გასაჩივრების პროცედურის გაუქმებით. გარდა ამისა ყველა განმცხადებელს აქვს შესაძლებლობა, უარის შემთხვევაში ნებისმიერ დროს წარადგინოს ვიზაზე ახალი განაცხადი. 

კვალიფიციური სპეციალისტებისთვის, პროფესიული განათლების მისაღებად, უმაღლეს სასწავლებლებში სწავლისა და ოჯახის გაერთიანებისთვის საჭირო ეროვნული ვიზის მიღება 2025 წლის 1 იანვრიდან შესაძლებელი გახდა მხოლოდ სპეციალურ პორტალზე ციფრული ფორმით განაცხადის შეტანის გზით, რაც შესაძლებლობას იძლევა, რომ განმცხადებელმა გასაგები და ინტუიციური ეტაპების გავლით წარადგინოს სრულყოფილი (ციფრული) განაცხადი. ონლაინ განაცხადების საპილოტე ფაზის გამოცდილებამ აჩვენა, რომ ეს მნიშვნელოვნად გააუმჯობესებს პროცესის ხარისხს და თავიდან აგვაცილებს არასრული განაცხადებით გამოწვეულ შეფერხებებს.